БЕРЛИН (Ројтерс) – Германскиот министер за финансии, Олаф Шолц, следната недела ќе ги повика финансиските водачи да се залагаат за минимално ниво на корпоративно оданочување на глобално ниво и да ја зголемат транспарентноста на долгот во земјите во развој, објави висок претставник на германската влада во петокот.

На разговорите во Вашингтон ќе доминираат политичките ризици како што се трговските спорови и заминувањето на Велика Британија од Европската унија, изјави владиниот претставник кој зборуваше анонимно.

Шолц, кој најверојатно ќе се соочи со повици за зголемување на фискалниот стимул за да се спречи ефектот на забавувањето на економијата, ќе им каже на сојузниците дека големиот германски вишок на тековната сметка постепено ќе се намалува поради енергичната домашна побарувачка, зголемувањето на реалните плати и зголемената државна потрошувачка.

“Ова нема да се случи брзо, ова ќе се случи чекор по чекор”, рече официјалното лице.

Германија очекува дека вишокот од тековната сметка, кој е далеку најголем во светот, ќе се намали на еквивалент од 6,8 отсто од својот економски производ следната година од 7,3 отсто оваа година.

Министрите за финансии и гувернерите на централните банки на 20-те најголеми економии во светот треба да се состанат во Вашингтон следната недела за да ја разгледаат состојбата на глобалната економија и политичките ризици за растот на врвот на агендата.

Во очи на пролетните состаноци на ММФ и Светската банка на 12 и 14 април, Управниот директор на Меѓународниот монетарен фонд, Кристин Лагард, во вторникот рече дека глобалниот раст го изгубил интензитетот во услови на зголемени трговски тензии и построги финансиски услови.

Шолц ќе бара минимално ниво на корпоративно оданочување на глобално ниво како важен чекор за спречување на дигиталните компании како што се Google, Фејсбук и Амазон да бараат земји кои се даночни раеви, наместо да оперираат од земји каде се наоѓаат нивните клиенти.

Владиниот официјален претставник изјави дека разговорите во Вашингтон треба да постигнат напредок на овој фронт и дека Шолц се надевал на договор меѓу членовите на Организацијата за економска соработка и развој (ОЕЦД) до средината на 2020 година.

Шолц, исто така, се очекува да побара од Кина и други земји да споделат повеќе информации за нивното кредитирање во други земји за да се зголеми транспарентноста на долгот.

Кина стана еден од најголемите позајмувачи на новите пазари, но не е членка на Парискиот клуб на владини доверители.