ИТ секторот е најбрзорастечки сектор во последните години, а во него државата вложува многу малку. Потребни се даночни ослободувања и начин како да се привлечат инвеститори за да се можеме да чекориме со останатите земји, велат од ИТ индустријата. Доколку побрзо не се преземат соодветни чекори, за некоја година ќе снемаме кадар кој ќе ја работи оваа професија поради заминување во други земји.
„Ако се истражува каде да се инвестира дали во Македонија, Косово, Албанија или Србија – таму веќе има ослободување. Данокот на личен доход е скоро 10 проценти во Косово, но придонесите за плата се три пати пониски од Македонија. Сега кажете ми зошто еден стратешки партнер би инвестирал во Македонија кога има подобри поволности во Косово?“, рече Влора Адеми- Стопанска комора на северозападна Македонија.
Од друга страна, во Албанија има данок на приход од 5 проценти, а кај нас 10. Но, според вицепремиерот Фатмир Битиќи, државата досега донела низа ослободувања кои им помагаат на компаниите во развој.
„….Рековме, ИТ секторот е важен зашто генерира и дава можност за младите генерации. Исчекорот ќе биде направен, но не може да се направи отстапка без притоа да видите дали таа ќе направи штета“, рече Фатмир Битиќи- Вицепремиер задолжен за економски прашања.
ИТ секторот во последните години најмногу придонесува за раст на просечната плата во земјава. Според последните податоци на Државниот завод за статистика, просечната плата на програмерите изнесува над 70 илјади денари.