Европската економија порасна најсилно во вториот квартал од 2020-та година, потврдија во вторникот новите проценки на Евростат, како одраз на олеснување на ограничувањата за пандемијата благодарение на вакцинацијата на граѓаните против Ковид-19.
Сезонски приспособениот БДП на Европската унија се зголеми за 1,9 проценти во периодот од април до јуни во споредба со претходните три месеци кога се намали за 0,1 проценти, пресмета Европскиот завод за статистика.
БДП-то на еврозоната порасна за 2,0 проценти, што исто така сведочи за закрепнување во споредба со првите три месеци од оваа година кога се намали за 0,3 проценти.
Активностите во двете области се зголемија најсилно од третиот квартал на 2020-та година, кога владите исто така ги ублажија ограничувањата по првиот бран на пандемијата. Оваа пролет, мерките беа ублажени паралелно со забрзаната вакцинација на граѓаните против Ковид-19.
Во споредба со вториот квартал од минатата година, кога беа воведени строги мерки за борба против првиот бран на пандемијата со Ковид-19, активностите во ЕУ, според сезонски приспособените податоци, се зголемија за 13,2 проценти.
Проценката за еврозоната беше малку намалена, од 13,7 на 13,6 проценти.
Во првиот квартал од оваа година, БДП-то во двете области беше 1,3 проценти помал отколку во истиот период од минатата година, непосредно пред појавата на пандемијата.
За споредба, американскиот БДП порасна за 1,6 проценти во вториот квартал во споредба со претходните три месеци, и за 12,2 проценти во однос на истиот период од минатата година, објави Европскиот завод за статистика.