Овој потег има за цел да се спротивстави на растот на цените
Јапонската влада размислува да ослободи нафта од своите резерви како одговор на растот на цената на суровата нафта, објави новинската агенција Кјодо, без да наведува извори, пренесува Ројтерс.
Ова ќе биде првпат земјата да ослободи резерви на нафта во име на намалување на цените, иако во минатото користеше такви резерви кога се соочи со природни катастрофи и геополитички ризици во странство, рече Кјодо.
Властите не беа веднаш достапни за коментар.
Владата на претседателот Џо Бајден, која се соочува со опаѓање на рејтингот на одобрување и повисоки цени на горивото, ги натера некои од најголемите светски економии да размислат за ослободување на нафта од нивните стратешки резерви за да ги задушат високите цени на енергијата.
За прв пат Кина беше повикана да размисли за ваков потег.
Јапонија позитивно одговори на првичниот американски повик за потенцијално координирано ослободување на резервите и размислува за таков потег, изјави за Ројтерс извор запознаен со ова прашање.
Генералниот секретар на кабинетот Хироказу Мацуно одби да ги коментира барањата на САД во четвртокот.
„Ќе продолжиме внимателно да следиме како растот на цените на суровата нафта ќе влијае на глобалните енергетски пазари и на јапонската економија“, изјави тој за новинарите. „Додека ги повикуваме земјите производители на нафта да го зголемат производството, ќе настојуваме да ги стабилизираме енергетските пазари преку координација со големите земји-потрошувачи и меѓународните организации“, како што е Меѓународната агенција за енергија.
Сиромашната со ресурси Јапонија најголемиот дел од нафтата ја добива од Блискиот Исток. Неодамнешните скокови на цените на нафтата и слабеењето на јенот ја зголемија цената на увозот, нанесувајќи двоен удар на земјата зависна од трговијата.
Во петокот, владата на премиерот Фумио Кишида го откри рекордниот стимулативен план од 490 милијарди американски долари кој вклучува и мерки за спротивставување на повисоките цени на нафтата.