Русија би можела да заработи речиси 321 милијарда долари од извозот на енергенси оваа година, но може да ја заврши годината со рекорден буџетски суфицит од 240 милијарди долари доколку земјите не воведат целосно ембарго на извозот на нафта и на гас, објави Блумберг.
„Поради рекордните цени на нафтата и на гасот, кои го сочинуваат главниот извоз на Русија, дури и со намалената продажба на енергија, Москва ќе добие рекордни приходи од 321 милијарда долари. Тоа е една третина повеќе отколку во 2021 година. Огромните приходи ќе доведат до рекорден суфицит на тековната сметка, кој според Институтот за меѓународни финансии може да достигне 240 милијарди долари“, наведува Блумберг.
Според аналитичарите, дури и со воведените санкции, ќе продолжи значителниот приход на Русија во валута различна од рубљата.
Единствената мерка што може да влијае на руската економија е ембаргото за продажба на енергенси.
Нафтата и гасот сочинуваат околу половина од извозот на Русија и околу 40 отсто од минатогодишните буџетски приходи.
Доколку ЕУ, Велика Британија и САД воведат ембарго, тоа би можело да ја чини Русија најмалку 300 милијарди долари приход.