Русија ќе го продолжи доброволното ограничување на производството на нафта за 300.000 барели дневно до крајот на годината, изјави вицепремиерот Александар Новак. По оваа објава, цената на суровата нафта „брент“ скокна над 90 долари за барел за прв пат од ноември 2022 година.
Русија ќе го разгледува доброволното намалување секој месец со цел да се разгледа можноста за дополнително намалување или зголемување на производството во зависност од ситуацијата на светскиот пазар, објасни Новак, пренесува РТ Интернешнл.
Таа мерка е преземена како дополнување на доброволното намалување што Русија претходно го најави во април 2023 година, кое ќе трае до крајот на декември 2024 година, објасни вицепремиерот.
Вториот најголем производител на нафта во светот го намалува производството и извозот на нафта во чекор со другата голема нафтена земја, Саудиска Арабија. Во посебна изјава, Ријад го продолжи своето доброволно намалување на производството од 1 милион барели дневно до крајот на годината, објави новинската агенција СПА, цитирајќи официјален претставник на Министерството за енергетика.
Последниот потег доаѓа по претходното доброволно намалување на нафтата од 1,66 милиони барели дневно што некои членки на ОПЕК + најпрво го најавија во април, а потоа се согласија да го продолжат до крајот на 2024 година. ОПЕК+, групацијата составена од Организацијата на земјите извознички на нафта и сојузниците, вклучително и Русија, која испумпува околу 40 отсто од светската нафта, го намалува производството од ноември 2022 година.