Вештачката интелигенција (AI) ќе предизвика многу компании да вработат помалку персонал во следните пет години, велат од „Adecco“ во извештајот во кој се истакнува порастот на вештачката интелигенција на работното место.

Околу 41 отсто од високите менаџери очекуваат да имаат помала работна сила поради вештачката интелигенција, се додава во извештајот, врз основа на истражување на директори од 2.000 големи компании ширум светот.

Генеративната вештачка интелигенција, која може да создава текст, фотографии и видеа како одговор на барањата, ги поттикнува надежите дека повторувачките задачи може да се отстранат од човечките должности и стравувањата дека многу работни места брзо ќе станат непотребни.

Технолошките компании, вклучително и глобалните гиганти како „Google“ и „Microsoft“, започнаа бран на отпуштања во изминатите неколку месеци бидејќи го пренасочија својот фокус на системи како „ChatGPT“ на „OpenAI“ и четботот „Gemini“ на „Google“.

Истражувањето на „Adecco“ е едно од најголемите за вештачката интелигенција и го следи истражувањето на Светскиот економски форум во 2023-та година, кое покажа дека 25% од компаниите очекуваат вештачката интелигенција да доведе до губење на работни места, а 50% веруваат дека технологијата ќе создаде нови позиции.

Додека повеќето високи директори анкетирани од „Adecco“ велат дека вештачката интелигенција ќе ја промени играта, мнозинството веруваат дека не постигнале доволно напредок во користењето на технологијата.

„Речиси сите работни места ќе бидат засегнати од вештачката интелигенција на еден или друг начин“, коментира извршниот директор на „Adecco“, Даниел Махуел.

„AI може да биде убиец на работни места, но може да биде и креатор на работни места“, додава тој.

„Постоеше голем страв пред 10 години дека многу работни места ќе бидат уништени од дигиталната технологија, а всушност многу работни места беа создадени од дигиталниот свет. Веруваме дека ова ќе биде избалансирано помеѓу работните места создадени од вештачката интелигенција и елиминираните работни места“, вели тој.

Компаниите треба да се подготват за промените со обука на своите вработени да работат со вештачка интелигенција, наместо да се потпираат на привлекување специјалисти однадвор, додава Махуел.

„Adecco“ ги истражуваше бизнисите во САД, Британија, Франција, Германија, Јапонија, Шпанија, Канада, Австралија и Сингапур. Секторите опфатени во студијата се одбрана, фармацевтски производи, здравство, индустриски и логистика.