Инфлацијата во САД падна побрзо од предвиденото до три проценти во јуни, што е охрабрувачки знак за Федералните резерви додека дебатираат кога и за колку да ги намалат каматните стапки од нивниот максимум во последните 23 години.
Годишниот раст на индексот на потрошувачките цени беше помал од очекувањата на економистите од 3,1 отсто, според прогнозите на Блумберг, а следеше по растот од 3,3 отсто во мај.
Приносите на трезорите паднаа, а фјучерсите на акциите пораснаа по објавувањето на бројките, бидејќи трговците ги зголемија облозите за две намалувања на каматните стапки оваа година, објави Фајненшл Тајмс.
Според LSEG, шансите за намалување на стапката во септември се зголемија на 92 отсто веднаш по податоците на Индексот за потрошувачките цени, во споредба со 72 отсто порано.
Податоците за инфлацијата доаѓаат од Бирото за статистика на трудот додека ФЕД бара дополнителни докази дека ценовните притисоци се намалуваат во најголемата светска економија.
И покрај очекувањата на пазарот на почетокот на оваа година за дури седум намалувања на каматните стапки во 2024 година, ФЕД досега ја задржа референтната стапка во опсегот од 5,25-5,5 отсто, што е највисоко од 2001 година.