Екстремните температури влијаат на падот на продуктивноста, а со тоа и на економијата, вели Јелена Жарковиќ, професорка на Економскиот факултет и нагласува дека треба да се прилагодиме на климатските промени, пренесува Политика. Екстремната топлина не влијае само на активностите на отворено, како што се земјоделството и градежништвото.
„Погодени се и секторите што се одвиваат во затворени простории, како што се индустријата и транспортот, се разбира, но и, на пример, туризмот“, објаснува професорката Жарковиќ.
„Истражувањето на економистите конкретно покажува дека кога температурата се зголемува над 32 степени, веќе на 33-34 степени, продуктивноста значително опаѓа. Во поголеми економии каде што веќе се направени некои проценки, како на пример, кај американските држави, штетата е веќе 100 милијарди долари годишно“, вели професорката и наведува дека се работи за огромна сума пари во однос на изгубената продуктивност. Не се само трошоците за користење електрична енергија, промените во проектните планови или во земјоделството.
„Изразено во однос на БДП, тоа е половина процент од БДП, што воопшто не е мал. Секоја година има предвидувања дека овие трошоци ќе се зголемуваат“, објаснува Жарковиќ. Прилагодувањето на условите за работа е конкретна работа што треба да се направи, нагласува таа.
„Многу земји веќе го применуваат ова, конкретно во земјоделството и градежништвото, каде што работниот процес се одвива во текот на ноќта или започнува многу рано наутро“, изјави професорката Жарковиќ за РТС.