„Тендер мора да има, но тој меморандум е необврзувачки, со кој компанијата 4iG изразува интерес, пројавува интерес дека е заинтересирана да се појави на тој тендер, инаку таман работа, сигурно не може тоа да биде дадено во четири очи, нормално и други доколку има компании што се заинтересирани и доколку сакаат да потпишат ваков необврзувачки меморандум, тоа ќе биде потпишано“, изјави претседателот на Владата, Христијан Мицкоски, одговарајќи на новинарско прашање.

Мицкоски истакна дека сега е време кога треба да се развива Македонија заедно со македонските граѓани и кога треба да владее правото.

„Заврши времето на договори во четири очи како што беа тие во кичевски РЕК ‘Осломеј’, битолски РЕК ‘Битола’, заврши времето кога голобради момчиња купуваа трговски центри во центарот на Скопје, кога се играше фудбалчиња и баскетче во канцелариите на Владата, сега е време кога треба да се развива Македонија заедно со македонските граѓани и кога треба да владее правото, тоа е суштината на работата“, изјави тој.

Премиерот Мицкоски објасни дека тендерот ќе биде распишан во периодот што следува и додаде:

„Сега моментно компаниите што се заинтересирани, можеби ќе има и други што ќе потпишат ваков меморандум, го анализираат пазарот и периодот што следува, нашиот интерес и интересот на граѓаните, а кој е интересот на граѓаните – поголема конкуренција и пониски цени. Интересот на граѓаните е и наш интерес како Влада“.