Европската централна банка (ЕЦБ) предупреди на можноста за враќање на кризата со јавниот долг во еврозоната доколку членките на блокот не успеат да го стимулираат економскиот раст, да го намалат нивото на јавниот долг и да го решат проблемот со политичката неизвесност.
Во својот годишен Извештај за финансиската стабилност, објавен во средата, ЕЦБ ја истакна загриженоста поради потенцијалните „пазарни сомнежи за одржливоста на јавниот долг“. Во исто време, банката укажа на „зголемените нивоа на долг и високи буџетски дефицити“, слабиот економски раст и неизвесноста предизвикани од „неодамнешните изборни резултати на европско и национално ниво, особено во Франција“.
Распонот на приносот помеѓу 10-годишните државни обврзници на Франција и Германија – клучен мерач на загриженоста на инвеститорите – се зголеми на 0,77 процентни поени овој месец, блиску до највисокото ниво во последните 12 години, постигнато пред парламентарните избори ова лето.
– Економските спротивставени ветрови против растот, како што е слабата продуктивност, ги прават зголемените нивоа на долг и буџетските дефицити уште поверојатно – предупреди ЕЦБ.
Пред повеќе од десет години, Грција за влакно избегна банкрот откако пазарите ја загубија довербата во стабилноста на заедничката валута. Кризата стивна дури кога тогашниот претседател на ЕЦБ, Марио Драги вети дека ќе направи „сè што е потребно“ за да го спречи колапсот на еврозоната.
ЕЦБ во средата посочи дека макроекономските шокови може дополнително да ги зголемат премиите за ризик на државните обврзници, предупредувајќи на „слабите“ основни економски показатели во неколку земји-членки. Посебно загрижува рефинансирањето на државниот долг кој доспева со сегашни повисоки каматни стапки.
Комбинацијата на низок раст и високиот јавен долг во областа на заедничката валута може да го отежне финансирањето на поголеми инвестиции во одбраната и борбата против климатските промени, додава ЕЦБ.
Банката, исто така, предупреди дека пазарите на акции и обврзници се изложени на зголемени ризици од „остри приспособувања“, укажувајќи на „високи вреднувања и концентрација на ризик“ кои веќе предизвикаа „неколку изразени, но краткотрајни скокови на нестабилноста“.
Во случај на економски пад, билансите на банките исто така би можеле да бидат погодени бидејќи потрошувачите и бизнисите во еврозоната веќе се борат со повисоки каматни стапки. ЕЦБ, исто така, предупреди на ризици во секторот на комерцијални недвижности, наведувајќи дека потенцијалните загуби може да бидат „значајни за одредени банки и инвестициски фондови“.