„Goldman Sachs“ ја зголеми својата прогноза за цената на златото на крајот на 2025-та година до 3.100 долари за троја унца наместо претходно очекуваните 2.890 долари, повикувајќи се на постојаната побарувачка од централните банки.

Банката верува дека „структурно повисоката побарувачка од централните банки ќе додаде 9% на цената на златото до крајот на годината, во комбинација со постепено зголемување на резервите на злато од страна на ЕТФ, бидејќи референтната каматна стапка паѓа“.

„Овие фактори треба да ги надминат негативните ветрови што произлегуваат од нормализирањето на позициите на инвеститорите, под услов да се намали неизвесноста“, додаде „Goldman Sachs“.

Но, ако несигурноста во политиката, вклучително и загриженоста за тарифите, остане висока, Голдман верува дека постои шанса златото да порасне до 3.300 долари за унца до крајот на годината поради продолженото шпекулативно позиционирање од страна на инвеститорите.

Банката, исто така, ја ревидираше нагоре својата прогноза за побарувачката на злато од централните банки на 50 тони месечно, во споредба со претходно проектираните 41 тон.

Ако купувањата во просек изнесуваат 70 тони месечно, цената на златото може да се зголеми до 3.200 долари до крајот на 2025-та година, под претпоставка дека позиционирањето се нормализира, велат од „Goldman Sachs“.

Спротивно на тоа, доколку Федералните резерви ги задржат каматните стапки непроменети, банката очекува златото да достигне 3.060 долари за троја унца во истиот период, се наведува исто така во соопштението.

Повторувајќи ја својата препорака до трговците „Упатете се кон злато“, „Goldman Sachs“ рече дека намалувањето на неизвесноста може да доведе до тактичко повлекување на цените, но долгите позиции во злато остануваат силно засолниште.

Ова е особено точно во услови на можни трговски тензии, финансиски или рецесиски закани, кои би можеле да ги поттикнат цените кон горниот дел од опсегот на „Goldman Sachs“ во услови на висока неизвесност, соопшти банката.

Понатаму, ако загриженоста за фискалната одржливост во САД ескалира, „Goldman Sachs“ предвидува дека златото ќе се зголеми за уште 5% до 3.250 долари за троја унца до декември 2025-та година.

Растечката загриженост за инфлацијата и фискалните ризици би можеле да ги поттикнат шпекулативните позиции повисоко, а загриженоста за одржливоста на американскиот долг може да ги поттикне централните банки, особено оние со големи резерви на хартии од вредност од државниот трезор на САД, да го зголемат купувањето злато, додава инвестициската банка.