Производството на возила во Северна Америка би можело да се намали за околу една третина до следната недела како резултат на царините од 25 отсто што ги воведе американскиот претседател Доналд Трамп за увоз од Мексико и Канада, се вели во анализата на S&P Global Mobility.
Тој производствен недостаток на континентот би изнесувал приближно 20.000 единици дневно, објави CNBC.
Се известува дека таквиот исход би бил последица на обидите на производителите на автомобили да ги ублажат зголемените трошоци предизвикани од новите американски тарифи и откажувањето на клиентите од купувањето нови возила.
Влијанието врз производството, како и можноста за отпуштања во автомобилската индустрија, би продолжиле да растат доколку не се променат или укинат тарифите, кои Трамп ги активираше денеска.
S&P Global Mobility забележува дека 25 производители на автомобили произведуваат во просек 63.900 лесни патнички возила дневно во Северна Америка.
Повеќето од нив, околу 65 отсто, се собрани во САД, 27 отсто во Мексико и осум отсто во Канада.