Пелагониските одгледувачи на овци соочени со големи проблеми со кои се загрозува опстанокот на оваа сточарска гранка. Бараат итни мерки за интензивирање на откупот на јагнињата и исплата на заостанатите субвенции.
Велат дека ресорното министерство треба да ја укине мерката 50/50 со која се условени при продажбата на јагнињата во време на откуп пред велигден. Од друга страна кланирачите нудат пониски откупни цени од реалната производна цена, со што се доведува во прашање нивната рентабилност.
Во моментов откупната цена на јагне се движи од 210 до 220 денари за кгр жива мера. Поради застој на откупот од 3 месеци, одгледувачите се условени од кланиците да продаваат по ниски, неисплатливи цени.
„Откупната цена е ниска, а обврската да предадеме половина од јагнињата во кланица ни го скратува просторот за пазарење. Ако не ги испорачаме, остануваме без субвенции. Јагнињата веќе се прераснати, што дополнително ја отежнува продажбата. Бараме итно укинување на оваа мерка и помош од Министерството за земјоделство. Субвенциите за 2024 година, исто така, сè уште не се исплатени, иако беше најавено дека по лозарите, ќе дојдеме ние на ред“, изјави Боби Бошевски, сточар од Пелагонија.
Слични ставови има и неговиот колега Кирил Стефановски, кој посочува дека околу 70 отсто од јагнињата во регионот се веќе прераснати и остануваат во шталите.
„Прераснатите јагниња не можеме да ги извеземе на италијанскиот пазар. Можеме во Албанија или Бугарија, но тие не се европски пазари. Проблемот произлегува токму од обврската за испорака во кланици. Нашите обиди да најдеме заедничко решение со Министерството досега не дадоа резултати“, предупредува Стефановски.
Откупот на јагнињата ќе трае уште десетина дена, но сточарите стравуваат дека без промена на политиките, голем дел од производството ќе остане непродадено.