Процентот на позајмувачи во Грција кои избираат фиксни каматни стапки кога добиваат финансии за покривање на потребите за домување или на потрошувачи се искачи на рекордно ниво. Ова е развој поврзан и со последната рунда на затегнување на монетарната политика на ЕЦБ, што ги направи домаќинствата поконзервативни во изборот, и со стратегијата на банките во лансирањето на нови производи, информира То Вима.

Конкретно, кредитните институции во последните четири години нудат повластени пакети со многу ниски каматни стапки и покрај тоа што трошоците за задолжување се зголемени, со цел да се стимулира побарувачката, во период на зголемена неизвесност.

Карактеристично е што во моментов има хипотеки со каматни стапки кои се во регионот од 4% за временски период, кој може да достигне и 30 години, додека за пократок период тие дури паѓаат и под 3%. Како резултат на тоа, во последните две години има големо пренасочување на нивните клиенти кон програми кои обезбедуваат месечни рати да останат стабилни неколку години или за целиот рок на отплата, без оглед на текот на европските каматни стапки.

Банкарски извори оценуваат дека овие трендови ќе останат доминантни и во ерата на поевтини пари, во која еврозоната веќе влезе од минатиот јуни.

Гувернерот на Банката на Грција, Јанис Стурнарас, исто така се осврна на ова прашање во неговиот Извештај за 2024 година, кој го објави претходно во април. Конкретно, централниот банкар ги повика банките поинтензивно да промовираат кредитни производи со фиксни каматни стапки.

Тоа е затоа што е во интерес на сите: Прво, должници кои можат да ги планираат своите животи без изненадувања, елиминирајќи го ризикот да бидат соочени со прекумерни оптоварувања поради монетарната политика. Второ, банките, чии приходи ќе можат побезбедно да се предвидат и ќе биде ограничена чувствителноста на нивните приходи на промени на каматните стапки.

Во првите два месеца од 2025 година беа договорени нови заеми од 201 милион евра, а 75% од кредитите се доделени со фиксна каматна стапка за период од три години или повеќе. Во истиот период лани овој процент изнесуваше само 60%, додека во првите два месеци од 2023 година достигна 67%.