Јавниот долг на земјава ќе се искачи на рекордни 66 проценти од БДП во наредната 2022 година. Владата вчера ја усвои новата Фискална стратегија за периодот од 2022-2024, со изгледи до 2026 година. Иако со претходните стратегии се планираше брзо стабилизирање на долгот по ковид кризата – или тој да се врати на старите патеки под психолошката граница од 60 проценти од БДП, сега со новите проекции планот е долгот да расте. Со стратегијата за управување со јавниот долг е предвидено до 2025 година тој да се задржи над психолошката граница од 60 проценти од БДП.
Земјава до март годинава должи 7,1 милијарда евра што е 62,5 проценти од БДП. Од Министерството за финансии, додека не ги објават стратегиите јавно, не откриваат колку милијарди ќе достигне долгот во наредните години.
За експертите максималното ниво на задолженост на земјава не треба да оди на 60 проценти.
МАКСИМАЛНОТО НИВО НА ЗАДОЛЖЕНОСТ НА МАКЕДОНИЈА ТРЕБА ДА БИДЕ НЕКАДЕ ОКОЛУ 55 ДО 60 ПРОЦЕНТИ ОД БДП. НАД ТОА НИВО ВЕЌЕ СИТЕ ЗБОРУВАМЕ ДЕКА Е НИВО КОЕ НОСИ ПРОБЛЕМИ СО ЈАВНИТЕ ФИНАНСИИ.ПОСТ КОВИД ЌЕ БАРА И 2022 МАЛКУ ПОЕКСПАНЗИВНА ФИСКАЛНА ПОЛИТИКА ПА И МОНЕТАРНА КАКО АНТИЦИКЛИЧНА ЗА ОВАА КРИЗА. ТОА ТРЕБА ДА СЕ ИЗДРЖИ . ИНАКУ ТОЈ ТРЕНД НЕ БИ ТРЕБАЛО ДА ПРОДОЛЖИ, ПОСЛЕ ТОА ЌЕ БИДЕ ТЕШКО ДА СЕ ЗАДОЛЖУВА МАКЕДОНИЈА И ПОНАТАМУ И НЕМА ДА МОЖЕ ДА ГО ИЗДРЖИ ОТПЛАЌАЊЕТО НА КРЕДИТИТЕ.
Според податоците на Телма за годинава е предвиден јавен долг од 63,9 проценти од БДП, во 2022 е највисок – 65,9 проценти, во 2023 е проектиран на 65,2 проценти. Намалување, но не подолу од 60 проценти е планирано за 2024 година – кога треба д а изнесува 62,5 проценти. Дури во 2025 треба да е 60,1 процент и дури 2026 да се спушти на 57,7 проценти од БДП.
Но за власта нема простор за загриженост.
„НАШИТЕ ГРАЃАНИ И НАШИТЕ ДЕЦА НЕ ТРЕБА ДА СЕ ГРИЖАТ ЗА ЗГОЛЕМУВАЊЕ НА ЈАВНИОТ ДОЛГ СЕ ДОДЕКА СРЕДСТВАТА КОИШТО ГИ ЗЕМАМЕ ГИ НОСИМЕ ЗА НИВНАТА ИДНИНА, ЗА ПОДОБАР ЖИВОТ. НИЕ ТОА ГО ДОКАЖАВМЕ И ТОА ЌЕ ГО ПРАВИМЕ. И ЗАТОА ПОЦВРСТА И ПОЈАКА ЕКОНОМИЈА ЗНАЧИ ПОМОЌНА ДА СЕ СПРАВИ СО ПОСЛЕДИЦИТЕ ОД ЕВЕНТУАЛНОТО НОВИ ЗАДОЛЖУВАЊА. И ТИЕ ОДАТ ЗАЕДНО СЕКОГАШ“- РЕЧЕ БИТИЌИ.
Премиерот Заев потврди дека долгот ќе се намали под 60 проценти од БДП во 2026 година.
Земјава заклучно со март годинава должи 7,1 милијарди евра – јавниот долг се искачи на 62,5 проценти од БДП. 2020 година ја завршивме со задолженост од речиси 6,5 милијарди евра или 60,2 проценти од БДП. До 2010 година долгот беше под 2 милијарди евра или 27,2 проценти од БДП. А за последните 15 месеци тој е зголемен за 13 проценти или за 1,6 милијарди евра.
ЈАВЕН ДОЛГ ПО ГОДИНИ
2021 63.9% од БДП
2022 65.9% од БДП
2023 65.2% од БДП
2024 62.5% од БДП
2025 60.1% од БДП
2026 57.7% од БДП
Извор: Министерство за финансии