„Со добра и ефективна имплементација на можностите од одлуката што вчера ја донесе Советот на Народната банка може да се постигнат значајни резултати.“ – истакна гувернерката на Народната банка, Анита Ангеловска-Бежоска во интервју за МТВ, во коешто акцентот беше ставен на регулаторните измени со коишто се овозможува поголема флексибилност за банките и штедилниците заради олеснување на финансискиот товар на корисниците на кредити.
Во интервјуто, гувернерката се осврна и на прашањето зошто не се примени мерка којашто би претставувала само пролонгирана отплата на ратите од кредитите во рок од три месеци.
„Ние работиме во рамки на нашите законски надлежности. Народната банка нема законска надлежност да пропише мораториум на наплатата на кредитите. Меѓутоа, ние го даваме нашиот максимум во однос на олеснување на финансискиот товар на засегнатите кредитокорисници. Тоа го направивме преку измените на одлуката со којашто се регулира управувањето со кредитниот ризик.“ – појасни Ангеловска-Бежоска.
Таа се осврна и на можностите коишто се даваат со донесените измени на регулативата којашто е во надлежност на Народната банка.
„Регулаторните измени што ги донесовме даваат многу поповолни можности. Меѓу другото, се дава можност за измена на договорните услови со коишто обврските за плаќање на кредитите можат да се пролонгираат и за период подолг од три месеци. Но со неа не се дава само можност за пролонгирање на обврските, туку и за подобрување на условите – намалување на месечната рата, намалување на каматната стапка итн. Се овозможува широк спектар на поволности коишто ги дава одлуката што ја донесовме и тие имаат поширок опфат од оној што се овозможува само со замрзнувањето на обврските во одреден временски период.“ – посочи гувернерката.
Во интервјуто коешто ќе се емитува на МТВ во вестите во дневникот на МТВ 1 во 17 часот, Ангеловска-Бежоска одговори и на низа друга актуелни прашања.