Во последниве недели, низ кинеските медиуми почнаа да кружат видеа од фармер кој покажува грст бисери собрани од школки одгледувани во специјализиран објект во округот Киемо, кој се наоѓа во срцето на пустината Такламакан. Според агрономите во регионот, успешното пробно одгледување на бисери е веќе факт, а бисерите од Ксинџијанг се очекува да бидат пуштени на пазарот следната година.
Ова е најновата иновација во секторот за аквакултура во регионот. Нејзините жители истакнуваат дека оддалеченоста на Ксинџијанг од индустриски загадувачи и недопрената природа го прават идеално место за одгледување на водни производи. Чен Џиажен, аквакултурист со над 20 години искуство, реши да го развие својот бизнис во Ксинџијанг по посетата во 2021 година, кога откри можности за развој на аквакултура* во регионот, вклучително и преку иновации во микробиолошката технологија за создавање вештачка морска вода.
По основањето на неговата компанија во 2022 година. со партнери од јужна Кина, Чен и неговиот тим успеаја да ја претворат солената вода од езерата во регионот во морска вода погодна за размножување морски риби. Користејќи микроорганизми, тие создаваат циркулациони системи кои придонеле за размножување на разни видови риби, ракчиња и абалони (саламски морски полжави).
Ксинџијанг почнува да се етаблира како иноватор во кинеската индустрија за аквакултура, со морска храна произведена во регионот сега достапна во рестораните и супермаркетите во поголемите кинески градови како Пекинг. Минатата година, регионот произведе 184.000 тони водни производи, генерирајќи вредност од 3,86 милијарди јуани и вработувајќи 13.600 луѓе.
Со зголемената побарувачка за производи од морска храна и аквакултура кои се со висок квалитет и без хемиски адитиви, плановите на фармерите во регионот за проширување на индустрискиот синџир стануваат се пореални.
Според Гонг Јонгхонг, претседател на компанијата зад одгледувањето бисери, успехот на бисерите се должи на уникатната природна средина на Ксинџијанг, со температурни флуктуации помеѓу денот и ноќта и долгите часови сончева светлина кои придонесуваат за нивниот висок квалитет.
Одгледувањето бисери во Ксинџијанг сè уште е во зародиш, но резултатите од првичните експерименти веќе го привлекоа вниманието на купувачите и компаниите за накит заинтересирани за изградба на нов индустриски ланец за поддршка на економскиот раст во регионот. Доколку квалитетот на бисерот продолжи да се подобрува, се очекува овој потфат да обезбеди нови економски можности за локалните заедници и да го стави Ксинџијанг на мапата како важен играч на глобалниот пазар на аквакултура и бисери.
*Аквакултурата е активност насочена кон репродукција и одгледување на различни водни организми.