Домот на народите на Парламентарното собрание на Босна и Херцеговина едногласно го усвои Законот за изменување и дополнување на Законот за данокот на додадена вредност (ДДВ) на Босна и Херцеговина, пренесува Фена. Предложените измени се однесуваат на враќање на плаќањето на ДДВ при купувањето на првиот недвижен имот за сите полнолетни физички лица кои престојуваат на територијата на Босна и Херцеговина.
Уставноправната комисија на Домот на народите претходно утврди дека предложениот закон е компатибилен со Уставот на БиХ и правниот систем на БиХ, а Комисијата за финансии и буџет ги поддржа начелата на предложениот закон.
„Повеќето од измените се технички, но една е суштинска, а тоа е дека во првата верзија на законот повратот на ДДВ беше можен само за купувањето на првиот стан, а измените го коригираа тоа и овозможија поврат на ДДВ за изградба на првата зграда, односно куќа“, рече пратеникот Саша Магазиновиќ.
Луѓето често велат дека ова е закон со кој се ослободуваат од ДДВ, што не е точно.
„Станува збор за закон кој овозможува поврат на ДДВ под одредени услови. Откако ќе се донесе овој закон, Дирекцијата за индиректно оданочување ќе ги пропише тие услови. Првичната намера на предлагачот е повратот на ДДВ да може да се реализира за купувачот за првите 40 квадратни метри станбена површина, а за дополнителни 15 метри квадратни за секој член на домаќинството“, изјави Магазиновиќ, пренесува Ал Џезира Балканс.