Бумот во набавките на живеалишта е во контраст со мрачната слика во другите делови на економијата

Британските кредитори одобрија повеќе од 100.000 нови хипотекарни кредити во ноември, што е најмногу од почетокот на финансиската криза во 2007 година, и покрај очекувањата за забавување на станбениот бум, кој започна по првата блокада заради Ковид-19, објави Ројтерс.

По падот на набавките на станови на почетокот на пандемијата во април и мај, побарувачката за нов дом започна да расте, делумно поттикната од привременото укинување на даноците за набавка на имот, што ќе истече кон крајот на март.

„Британскиот пазар на домување ужива во најпрометниот Божиќ во повеќе од една деценија“, рече Дејвид Рос, управен директор на компанијата за недвижнини „Хометрак“.

Бум во купувањето на домови е во контраст со мрачната слика во другите делови на економијата, кои не успеваат да закрепнат, особено сега кога Велика Британија беше погодена од нов вид на ковид-19, утврден минатиот месец.

Податоците од понеделникот од Банката на Англија покажаа дека доверителите одобриле 104.969 хипотеки во ноември, што е најмногу од август 2007 година, а пред се предвидувањата на анкетата на Ројтерс за економисти, предвидуваа пад на 82.500.

Податоците од минатата недела од кредиторите на хипотеки на национално ниво покажаа дека цените на куќите во Велика Британија пораснаа побрзо отколку што се очекуваше во декември и го забележаа најголемото годишно зголемување во последните шест години за 7,3%.

Заедно со даночните олеснувања, пораспространетата работа од дома ја поддржува побарувачката за поголеми рурални и приградски домови во споредба со становите во центарот на градот, велат брокерите за недвижнини.

Од друга страна, необезбедените потрошувачки кредити паднаа со рекордна годишна стапка, бидејќи многу Британци ги намалија трошоците за време на новата блокада во голем дел од Велика Британија во ноември, со што се затворија несуштинските бизниси. Други стравуваат дека ќе останат без работа во 2021 година.

Нето кредитирањето на потрошувачите падна за 1,539 милијарди фунти (2,10 милијарди долари) во ноември, што е приближно во согласност со очекувањата и е за 6,7% под нивото од ноември 2019 година, најголем пад од почетокот на водењето на месечна статистика од 1994 година
Министерот за финансии Риши Сунак се надева дека намалувањето на кредитите и зголемувањето на заштедите за побогатите домаќинства ќе овозможат да се поттикне растот по повторното отворање на економијата во 2021 година. Но, некои економисти веруваат дека ќе преовладува претпазливоста.

„Продолжуваме да веруваме дека домаќинствата ќе потрошат само мал дел од „присилната заштеда“ акумулирана минатата година, а нивните вкупни трошоци нема да закрепнат до претходниот врв до средината на 2022 година“, рече Самуел Томбс од „Пантеон Економикс“.