Економскиот раст во Германија може да биде послаб оваа година отколку што беше предвидено, бидејќи економијата неочекувано може да биде оптоварена со повторување на пандемијата со Ковид -19 оваа есен, предупреди Бундесбанката во понеделникот.
Се очекува најголемата европска економија да порасне 3,7 проценти оваа година и 5,2 проценти во 2022 година, но заздравувањето во првите недели беше послабо од предвиденото и најверојатно ќе влијае на годишните резултати, оцени Бундесбанк.
Економијата, најверојатно, ќе порасне силно во летните месеци, бидејќи секторот услуги ги ублажи корона мерките паралелно со намалувањето на бројот на заразени, што ги зголеми приходите од туризмот.
Иако владата би можела повторно да воведе некои ограничувања оваа есен, ако бројот на заразени продолжи да расте, најверојатно нема да бидат толку строги како во претходниот период, бидејќи Германија постигна напредок во вакцинирањето на населението, додаде централната банка во месечниот извештај.
Заканата несомнено е предизвикана од побавната стапка на вакцинација и индикаторите за расположението веќе сигнализираат зголемена загриженост поради ширењето на делта варијантата на вирусот во Европа.
„Делта сојот и послабата динамика на вакцинација може повторно да го поттикнат заострувањето на мерките за заштита, што дополнително ќе ја оптовари економијата во есенскиот квартал“, вели Бундесбанк.
Од таму потврдија дека инфлацијата може да се приближи до нивото од пет проценти до крајот на годината, што е значително над целното ниво на Европската централна банка од два проценти, но на почетокот на следната година, растот на цените треба нагло да забави.