Цената на сировото кафе во светот достигна највисоко ниво досега – се удвои за само една година. Причините се многубројни: опаѓање на приносите во клучните региони, климатски катастрофи и неправилности во глобалното снабдување. Сето ова се одрази и на домашниот пазар. Поради глобалните предизвици, производителите мораа да ги приспособат цените на своите производи за да бидат во чекор со драстичното зголемување на трошоците.
Еден од клучните фактори кои влијаат на рекордните цени е сушата во Бразил, најголемиот светски производител на кафе, што ја намали количината на кафе достапна за извоз. Покрај тоа, глобалната транспортна криза, зголемените трошоци за енергија и растот на цената на нафтата дополнително ја зголемија вкупната цена на сировото кафе. Последиците од овие светски фактори не можеа да се избегнат на домашниот пазар, поради што производителите во Македонија и регионот се принудени да ги зголемат цените на своите производи.
Со оглед на тоа дека кафето е еден од најважните делови од секојдневниот живот на многу потрошувачи, зголемувањата на цените ги погодуваат буџетите на домаќинствата. Сепак, експертите забележуваат дека зголемувањето на цените на кафето не е резултат на желбата на производителите да профитираат на сметка на потрошувачите, туку повеќе е неизбежна последица на глобалните економски и климатски фактори. Само со стабилизирање на глобалниот пазар и производствените синџири ќе можеме да очекуваме стабилизација на цените во иднина.
Производителите на кафе нагласуваат дека во оваа ситуација квалитетот на кафето останува нивен приоритет бидејќи сакаат да ја задржат довербата на потрошувачите и да им обезбедат кафе кое ги задоволува стандардите на кои се навикнати.
Вниманието на трговците со кафе сега е насочено кон претстојната сезона во Бразил, која исто така не изгледа ветувачка. Прогнозите се обесхрабрувачки бидејќи се очекуваат уште послаби приноси од минатата година поради долгите периоди на суша.
Гледајќи напред, цените на суровините може да се очекува да останат стабилни само доколку глобалниот пазар и климатските фактори се стабилизираат. Експертите, сепак, посочуваат дека овие фактори не се санираат лесно и не се знае кога светскиот пазар целосно ќе закрепне, но можно е натамошното поскапување да биде поумерено.