На повеќето азиски берзи цените на акциите денеска паднаа, а благо падна и вредноста на доларот во однос на останатите валути. Во исто време, цената на златото достигна највисоко ниво во историјата – пишува хрватски Индекс. Индексот на азиско-пацифичките акции, без јапонските акции, беше речиси непроменет од вчера во 07:00 часот. Истовремено, на токиската берза индексот Никеи ослабе за 0,3 отсто, додека цените на акциите во Шангај и Јужна Кореја паднаа за околу 0,3 отсто. Во Хонг Конг и Австралија тие се зголемија меѓу 0,1 и 1 процент.
Кинеските берзи беа под притисок во последните денови поради побавното закрепнување на тамошната економија, но и поради неуспешниот обид за атентат на републиканскиот кандидат за претседател на САД, Доналд Трамп.
Доколку победи Трамп, тоа може да доведе до нов трговски конфликт меѓу Белата куќа и Пекинг, како што беше случајот во неговиот прв мандат. Останатите берзи во регионот го следат вчерашниот раст на Волстрит, па цените на акциите во Австралија достигнаа рекордни нивоа, а во Нов Зеланд највисоки нивоа во последните две години. Од ваквото движење на вредноста на акциите се очекува американската економија да избегне рецесија и покрај високите каматни стапки. Тоа го покажаа и вчерашните податоци за продажбата на мало, која бележи пораст, но таа е побавна од претходните месеци.
По неколкумесечниот силен раст на цените на акциите на технолошките компании, во последните денови нивниот раст е забавен, а цените на акциите на оние сектори и компании кои би можеле повеќе да имаат корист од намалувањето на каматните стапки, растат побрзо. На девизните пазари, пак, вредноста на доларот во однос на кошничката валути благо падна. Индексот на доларот, кој ја покажува вредноста на американскиот долар во однос на другите шест најважни светски валути, утринава се движи околу 104,26 поени, додека вчера во ова време изнесуваше 104,30 поени.
Истовремено, курсот на доларот во однос на јапонската валута се лизна од вчерашните 158,55 на 158,50 јени. Американската валута исто така ослабе во однос на европската, па цената на еврото достигна 1,0925 долари, додека вчера во ова време беше 1,0895 долари.
Цените на нафтата, од друга страна, паднаа. Цената на барелот на лондонскиот пазар утрово падна за 0,13 отсто, на 83,65 долари, додека на американскиот пазар цената на барелот се намали за 0,12 отсто, на 80,65 долари. Бидејќи се очекува намалување на каматните стапки во светот, приносите на обврзниците се намалуваат во последните денови, додека цената на златото расте. Така, утринава достигна највисоко ниво во историјата – 2478 долари за унца.
„Вреди да се забележи фактот дека се враќа вредноста на златото годинава. Не сме сигурни како ќе се движи цената во наредните месеци, но може да го надмине нивото од 2.500 долари за унца“, вели Вивек Дар, стратег во Комонвелт банка на Австралија.