Министерот за економија, Бесар Дурмиши денеска изјави дека истече мандатот на синдикатите и дека повеќе не се репрезентативни. Според него, Комисијата за утврдување на репрезентативност веќе функционира.
-Зависи кој синдикат ќе биде репрезентативен. Веднаш кога ќе се определи, ќе го свикам Економско-социјалниот совет и синдикатите таму ќе ги кажат своите барања, а не на улица. Ние уште од почеток кажавме дека како Влада ги почитуваме и сме за социјален дијалог. Се што ќе се договорат со работодавачите за минималната плата, ќе излеземе во пресрет, рече Дурмиши.
Министерот вели дека морал да ја потпише одлуката за минималната плата пред 31 март, според која платата се зголеми за 1800 денари.
-Замислете ако не ја потпишавме? Ќе се блокираше целата држава и институции и приватниот сектор немаше да може да пресмета плати за нивните вработени, кажа Дурмиши.
Денеска во 12 часот и пет минути Сојузот на синдикатите на Македонија ќе започне протест на кој ќе излезе членството за да го изрази своето незадоволство од ниските плати но и поради односот на Владата во пристапување на решавање на проблемот околу зголемување на минималецот, барајќи 500 евра минимална плата.
Протестот предвидено е да почне пред Работничкиот дом по што присутните ќе се упатат пред Собранието и Стопанската комора, а ќе заврши пред Владата. Претседателот на ССМ Слободан Трендафилов вчера рече дека владините политики се во погрешна насока и на штета на работниците.