Земјите од ЕУ се сè поподелени пред вонредниот состанок на министрите за енергетика што ќе се одржи денеска (26.10) во Луксембург. Советот ќе бара решение за поскапувањето на енергенсите. Некои членови се залагаат за промена на прописите, додека други се остро против, пишува Ројтерс.
Франција, Шпанија, Чешка и Грција сакаат подолгорочно решение за намалување на нестабилноста на пазарот. Министрите од овие земји денеска ќе ги повикаат своите колеги заеднички да купуваат природен гас, да создадат резерви за итни случаи и да ги поделат европските цени на струјата и гасот. Полска ќе инсистира на одложување на спроведувањето на политиките на Зелениот договор.
Унгарскиот премиер Виктор Орбан ги опиша зелените политики на заедницата како „утописка фантазија“, додека повеќето земји од ЕУ повикаа на побрза зелена транзиција за да се намали зависноста на ЕУ од увоз на фосилни горива. Земјите увезуваат речиси 100% од нивната нафта и гас, како и 44% од јагленот што го трошат.
Но, во исто време, девет земји, меѓу кои и Германија, која е локомотива на европската економија, се против пазарните реформи. „Ова нема да го ублажи сегашниот пораст на цените на фосилните горива“, се вели во заедничката изјава.
На почетокот на октомври, ЕК ги претстави своите насоки пред европските членки за намалување на сериозноста на енергетската криза. Еден од нив беше поврзан со барањето на европските регулатори за анализа на структурата на енергетските пазари. Но, немаше докази дека различните правила и структури ќе ги решат проблемите.
Извор на Ројтерс е категоричен дека земјите немаат намера да интервенираат на пазарот, вклучително и поделба на цените на струјата и гасот, иако тоа е можно. Идејата за заедничко купување гас би траела со месеци преговори со сите засегнати страни и не може да се нарече мерка за брзо решавање на проблемот.