Кога оваа држава ќе донесе некој закон, тој повеќе отвара проблеми отколку што решава.

Но, да одиме хронолошки.

На почетокот на месец Јануари 2025 година, поради неподносливост на цените и силна сиромаштија, дел од населението се одлучи да се креира групата на Фејсбук: Бојкот!!!Стоп за високите цени на храната!!! Линк: https://www.facebook.com/groups/9115739075209648/

На 30 јануари, јас во групата го пишувам следниот предлог, со најдобра намера и цел да му помогнам на нашиот народ, за што и впрочем го изградив Ценометар.мк пред 5 години:

 

Го видоа предлогов најверојатно од владеачката партија, и најверојатно го прифатија, и најнормално никој ниту ме исконтактира ниту ми се јави. Класична македонска работа, да се земе добрата и напредна идеја, и да се престави како своја. Ако, не се лутам, напротив ги поддржувам бидејќи ја прифатија оваа идеја, без разлика дали некој мене ме контактирал или не.

На 11.02.2025 излезе премиерот Мицкоски со предлог да маркетите јавно ги објавуваат цените, потег кој го поздравувам: https://makfax.com.mk/ekonomija/%D1%81%D0%B8%D1%82%D0%B5-%D0%BC%D0%B0%D1%80%D0%BA%D0%B5%D1%82%D0%B8-%D0%BD%D0%B0-%D0%B2%D0%B5%D0%B1-%D1%81%D1%82%D1%80%D0%B0%D0%BD%D0%B8%D1%86%D0%B8-%D0%B4%D0%B0-%D0%B3%D0%B8-%D0%BE%D0%B1%D1%98%D0%B0/

Потоа Законот се туркаше во Собранието, каде пратениците кои го предлагаа, користеа информации и споредби од мојот сервис Ценометар.мк. И тоа го поздравувам, ја знаеме повисоката цел тука.

На 24.02.2025 година се донесоа законските измени за да мораат маркетите да ги објавуваат цените јавно: https://sitel.com.mk/marketite-so-zadolzhenie-da-gi-objavuvaat-site-ceni-sekoj-den

И сето ова е во ред, дотука.

Проблемот настанува, што сега имате еден куп помали маркети со 2 или 3 локации, бензински пумпи со неколку локации и слични помали бизниси од трговијата, кои имаат обврска да ги објавуваат цените, но немаат ни знаење, ни инфраструктура, ниту па толку финансии за да ги објавуваат секој ден цените. Немаат ни лица со доволен број ИТ вештини што можат да им помагаат тука.

Е сега, што се случува тука?

Ние како сервис, се понудивме маркетите да ги објавуваат цените на Ценометар.мк многу едноставно, со еден испратен маил наутро. Толку… Цена? Смешки, 2000 денари месечно.

Арно ама, од Министерството за Економија, добивме одговор дека не смеат тие да објавуваат на трет сервис. „Така било со законот предвидено“. Законот кој се донесе практично на мое решение.

Ајде, во ред, нека биде и така. Мада не ја гледам употребната вредност на нештото, бидејќи ќе се изгубат луѓето во скролање по различни веб сајтови и ништо нема да се постигне. Ќе заборави и цена и се човек додека плови лево десно помеѓу сајтовите.

Што е најјакиот момент сега тука.

Компаниите кои им ги даваат касовите софтвери на маркетите, сега им се отвори лукративен фронт, и истиот ќе го експлатираат максимално.

Според неколку маркети, кои сами ни се пожалија, сега овие компании, особено една голема која го држи скоро целиот пазар на касов софтвер за маркети во Македонија, им нудат „решение“ да им направат веб страна за 2.900 евра, каде преку АПИ автоматски ќе се ажурираат цените од маркетот, и за одржување уште околу 100 евра месечно. Инаку такви веб страни со едно АПИ коштаат околу 30 евра.

И?

И повторно се промаши целта. Наместо да се објавуваат на едно место за споредба, ова на никого нема да му врши работа, граѓаните пак ќе лутаат по разни сајтови без да можат на чисто да ги видат цените, маркетите, особено помалите се оптоварени без потреба со трошок од околу 3.000 евра еднократно а потоа и плус месечно одржување и пак никој нема да е информиран.

Овој нов трошок, ќе се одрази само и повторно на крајниот потрошувач, и повторно цените ќе се повисоки.

Со ваква имплементација, целта е целосно промашена.

А промашена е што се крадат идеи, никој не го консултира носителот на идејата како треба да се изведе целото, сите се заслепени по лични интереси и избегнување на работа.

Јас одговорно тврдам, дека на овој начин, ништо нема да се промени, напротив.

Битно, да се добогатат продавачите на софтвер од 90-тите, можда ова е и некаков си дил со нив, главно за широките маси, нема бенефит.

Имаш народи и поединци кои водат, и оние кои се водени. Овој народ, едноставно нема поединци кои водат во своето мнозинство, ами безидејни, неработни, но лакоми поединци, кои и добрата идеја – лошо ќе ја реализираат.

Затоа почитувани граѓани, продолжете да јадете камења и корења и да ги богатите селскиве елити, кои вчера ги слекоа опинците, па затоа ги набивет лакованиве кондури.

Споделете доколку се согласувате.

 

Со почит,

Наум Димитровски