Кинескиот министер за трговија Ванг Вентао објави дека договорот за регионалното сеопфатно економско партнерство (РЦЕП) е ратификуван за време на Националниот народен конгрес во Пекинг, три месеци пред предвидениот рок.
Тој ги повика другите земји-членки што побрзо да го ратификуваат договорот.
„Колку побрзо стапи на сила договорот, толку побрзо ќе имаат корист луѓето од земјите-членки“, рече Вентао за „Саут Теа Морнинг Пост“.
Трговски договор со 15 члена беше потпишан во средината на ноември. Тој е најголем светски договор за слободна трговија и вклучува 10 членки на Здружението на нации од Југоисточна Азија (АСЕАН), плус Кина, Јапонија, Јужна Кореја, Австралија и Нов Зеланд.
Договорот за РЦЕП ќе стапи на сила 60 дена откако ќе биде ратификуван од шест земји-членки на АСЕАН и три земји што не се членки на АСЕАН.
Според Хи Пинг, професор по меѓународна политика на Универзитетот Фудан во Шангај, забрзаната ратификација на кинеската влада е потег да се мотивираат другите земји да ги забрзаат своите постапки.
„Јапонскиот парламент работи на ратификацијата и не треба да има проблеми. Проценуваме дека нема да има проблеми со ратификација и во другите земји на АСЕАН “, рече тој, додавајќи дека доколку се надмине прагот, договорот ќе стапи на сила до крајот на 2021 година или почетокот на 2022 година.
Првпат предложен во 2011 година, РЦЕП ќе отстрани дури 90 проценти од царинските давачки за увоз меѓу нејзините потписнички во рок од 20 години. Исто така, ќе се воспостават заеднички правила за е-трговија, трговија и интелектуална сопственост. Така, новиот економски блок ќе претставува околу една третина од светскиот бруто домашен производ и население.
Тоа ќе стане првиот договор за слободна трговија што некогаш ги вклучува Кина, Јапонија и Јужна Кореја – прва, втора и четврта економија во Азија. Еден од првичните партнери, Индија, одби да учествува во преговорите поради загриженост дека отворањето на нејзиниот пазар ќе доведе до зголемување на трговскиот дефицит со Кина.