Минималната задолжителна резерва на доверителите ќе се намали за 50 основни поени од 6 јануари

Кинеската централна банка го намали износот на готовина што кредиторите треба да ги задржат во резерва и сигнализираше продолжување на својата политика за намалување на трошоците за позајмување на компаниите, објави Блумберг.

Минималните услови за резерви на доверителите ќе бидат намалени за 50 основни поени од 6 јануари, ослободувајќи околу 800 милијарди јуани (115 милијарди американски долари) ликвидност во финансискиот систем, објави Централната банка на Кина на својата веб-страница во средата. Намалувањето има за цел да им помогне на банките да ги намалат каматните стапки на деловните заеми, се вели во посебната изјава на централната банка. Во моментов, минималниот однос на задолжителната резерва е 13% за големите банки и 11% за помалите.

Овој потег, објавен однапред од страна на премиерот Ли Куцианг, кон крајот на минатиот месец, покажува дека централната банка се придржува кон својата практика за одржување на добро ниво на ликвидност на внатрешниот пазар, во услови на напори на властите за поддршка на приватниот сектор.

„Очекуваме Кинеската Централна банка да ја одржи својата политика за олеснување, додека одржува умерена стапка на намалување на каматните стапки“, рече Ли-Ганг Лиу, економист во „Ситигруп АД“. Тој рече дека каматната стапка на среднорочните заеми најверојатно ќе падне за 5 до 10 основни поени во првиот квартал на 2020 година. „Адаптивната монетарна политика ќе ја поддржи домашната побарувачка и особено инвестициите на фиксен капитал“, додаде економистот.

Намалувањето на минималните резерви е во согласност со очекувањата на пазарот дека кинеската централна банка ќе ги зголеми средствата во финансискиот систем во јануари за да ја олесни можната криза со ликвидноста, предизвикана од зголемената продажба на суверен долг и зголемената побарувачка за пари за време на празниците во банките. Во изјавата објавена порано во средата, централната банка соопшти дека ќе ја задржи монетарната политика флексибилна и ќе работи за поевтино кредитирање на деловните активности, бидејќи економијата сè уште се соочува со големи ризици.

Во четвртокот, локалните власти, исто така, ја продолжија продажбата на долгови за да соберат средства за инфраструктурни проекти. Со првото издавање на државен долг оваа година, властите во Сечуан и Хенан ќе понудат вкупно 87,6 милијарди јуани во т.н. специјални обврзници.

Централната банка на Кина објави дека планираното намалување на резервите ќе заштеди околу 15 милијарди јуани од трошоците за финансирање на банките за една година, што укажува дека најверојатно ќе падне основната стапка на кредити.

Каматната стапка на кредитите со рок на достасување до 1 година најверојатно ќе падне за пет основни поени овој месец, додека каматната стапка на петгодишните заеми ќе остане непроменета.

„Ако економскиот раст покаже повеќе знаци на стабилизација и закрепнување по намалувањето, голема е веројатноста дека централната банка ќе го забави темпото на натамошно намалување на резервите“, рече Ева Ји, економист во China International Capital Corp.

 

Забрането превземање на содржината без претходна согласност од редакцијата на БанкоМетар.мк