Агенцијата Fitch официјално предупреди дека може да го намали кредитниот рејтинг на Израел на А+ доколку конфликтот со палестинската исламистичка група Хамас ескалира. Ризикот од вклучување на други непријателски актери кон Израел значително порасна, забележа Fitch во вторникот.

Агенцијата го објави извештајот пред нападот на болницата во палестинската енклава Газа, кој однесе стотици животи и предизвика бран протести во арапските земји, Иран и Турција.

Голема ескалација може, покрај загубата на човечки животи, да резултира и со значително повисоки воени трошоци, уништување на инфраструктурата, што значително би ја ослабнало кредитната способност на Израел, нагласува Fitch.

Сегашната ситуација веројатно го поддржува сегашниот рејтинг на националниот долг на Израел, истакнаа тие.

„Благодарение на комбинацијата на динамична израелска економија која создава висока додадена вредност, докажана отпорност на регионални конфликти, подготвеност за воен конфликт, солидна фискална и надворешна метрика и готовински резерви, релативно краток конфликт, главно ограничен на Газа, веројатно нема да влијае на Рејтингот на Израел“, заклучија во Fitch.

Moody’s минатата недела предупреди дека долготрајниот конфликт со Хамас може да му наштети на кредитниот рејтинг на Израел.

„Кредитниот профил на израелската држава досега беше отпорен на терористички напади и воени акции“, нагласува аналитичката група на компанијата во белешката. „Меѓутоа, продолжениот конфликт кој трајно и значително ќе ги наруши економската активност и политичките одлуки ќе ја тестира таа издржливост“, додаваат тие.

Прегледот на рејтингот беше закажан за минатиот петок, но Moody’s не го објави извештајот. Ниту една од трите водечки рејтинг агенции, S&P Global, Moody’s и Fitch, никогаш не го намалила рејтингот на Израел, забележува Reuters.

Во меѓувреме, трошоците за осигурување од проблеми со сервисирањето на државниот долг на Израел нагло се зголемија, забележува Reuters, посочувајќи на скок од 80 отсто на цената на финансиските деривати врз основа на замените за неисполнување на кредити (CDS).