Компаниите да станат поотпорни и приспособени за какви било кризи. Според постојаниот претставник на УНДП во земјава, Армен Григорјан, првиот чекор тие треба  да направат проценка за ризикот и да се изработат различни сценарија.

-Врз основа на процената на ризикот и на сценаријата да се подготват преку вежби како би постапиле во кризна ситуација и да ги согледаат сите сценарија- кажа Григорјан пред почетокот на панел-дискусијата „Градење отпорност преку ефективно планирање на континуитетот на бизнисот“, што се одржува во Стопанската комора во коорганизација со УНДП.

Тој посочи дека УНДП имаат долгогодишни искуства во оваа сфера, особено во поглед на неодамнешната криза со ковид-19 во која, како што рече, УНДП понуди програмска опција.

-Понудата се модифицираше според околностите во секој поединечен контекст во кој работи УНДП. Во Украина има еден вид понуда, во Газа друг. Во Северна Македонија тој контекст е сосема поразличен и нашата понуда ќе биде модифицирана според потребите на земјата, рече Григорјан.

Претседателот на Стопанската комора, Бранко Азески, пак, истакна дека се разговара за стратегија за постапување во вонредни ситуации и за справување со нив на поинаков начин, превенирајќи ги и доведувајќи ги компаниите во подобра позиција, нешто што, потенцира, можеби го сметаме за маргинално, но во денешни услови станува сè позначајно.

-Мислам дека тоа е најдобриот начин за заштита. Скопје во 1963 година доживеа земјотрес со кој се сруши целата економија и згаснаа огромен број животи како капитал ненадоместлив за бизнисот. Со панел-дискусијата УНДП  и целата меѓународна заедница покажа дека знаат точно да ги лоцираат темите коишто можеби нам ни изгледаат нелогични, но имаат свој придонес  за нашето работење, рече Азески.

Нагласи дека Стопанската комора како комора на иднината отвора нови теми, нови алатки кои се во интерес и во функција на компаниите. Панел-дискусијата е наменета да биде платформа за споделување идеи и искуства помеѓу индустриските лидери и чинители, каде што ќе може да слушнат најдобрите практики и стратегии што се користат за градење отпорност и континуитет во бизнисот. Идејата за нејзиното одржување, како што велат од Комората, дојде од одбележувањето на 60-годишнината од катастрофалниот земјотрес во Скопје.