Народната банка уверува: Денарот е и ќе остане стабилен!

Граѓаните треба да бидат спокојни. Денарот е и ќе остане стабилен, нема и нема ни да има промени на нивото на неговиот девизен курс, велат од Народната банка демантирајќи ги сите шпекулации коишто деновиве се шират во врска со курсот на домашната валута.

„Девизните резерви, кои се клучната гаранција за стабилноста на девизниот курс на домашната валута, во изминатиот период достигнаа историски највисоко ниво. Од почетокот на овој месец, тие остварија раст од 603,8 милиони евра. Високото ниво на девизните резерви од над три милијарди евра, не само што е соодветно за одржување на стабилен курс на денарот туку, како што веќе и имаме посочено, тоа е двојно повисоко во однос на 2008 година, кога како централна банка успешно одговоривме на предизвиците од тогашната глобална економска и финансиска криза”, велат од Народната банка.

Потсетуваат дека имаат и низа инструменти што се дополнителна гаранција за стабилноста на девизниот курс на денарот во однос на еврото.

„Истовремено ве известуваме дека и со најновите проекции на Народната банка, во претстојниот период се очекува и натамошен раст на девизните резерви. И во проекциите на сите релевантни меѓународни институции се посочува дека нивото на девизните резерви на нашата земја е и ќе остане адекватно и дека на ниту еден начин нема да биде загрозена стабилноста на денарот. Неодамна, во текот на мај, двете најугледни светски агенции за кредитен рејтинг – „Стандард и пурс“ и „Фич“, во основа задржувајќи го досегашниот кредитен рејтинг на земјата, истовремено потврдија и дека нема опасности за стабилноста на девизниот курс на нашата домашна валута”, посочуваат од Народна банка.

Оттаму ги демантираат шпекулациите во врска со девизниот курс на денарот и  известуваат дека стабилноста на девизниот курс на домашната валута била, е и ќе остане приоритет на Централата банка и таа е загарантирана.

„И овој пат, апелираме на совесно и одговорно информирање и проверка на вистинитоста на изворите на информации во врска со домашната валута и нејзиниот девизен курс. Како што посочивме и во двата наврати кога на социјалните мрежи се споделуваа шпекулации во врска со домашната валута, пласирањето неточни или непроверени информации во врска со денарот може да креира негативни ефекти за македонската економија. Повторно потсетуваме дека, како што во повеќе наврати соопштивме – девизниот курс на денарот е и ќе остане стабилен”, категорични се од Народна банка.