На азиските берзи денес (среда), цените на акциите пораснаа, како и на Вол Стрит вчера, бидејќи инвеститорите се оптимисти благодарение на почетокот на вакцинацијата против ковид-19 и затоа што очекуваат нови стимулации во САД.
Индексот на акции во Азија и Пацифик MSCI, со исклучок на јапонскиот, се зголеми за 0,8 проценти околу 7,00 часот по два дена пад.
На берзата во Токио, индексот Никеи зајакна 0,3 проценти, додека цените на акциите во Шангај, Австралија, Јужна Кореја и Хонг Конг пораснаа помеѓу 0,1 и 0,8 проценти. Во Сингапур, од друга страна, тие малку паднаа.
Азиските инвеститори беа охрабрени од вчерашниот раст на цените на акциите на Вол Стрит за повеќе од 1 процент, со индексот Насдак кој достигна нов рекорд бидејќи инвеститорите очекуваат дополнителни стимулативни мерки за заштита на економијата од пандемијата на коронавирусот.
Доу Џонс порасна за 337 поени или 1,13 отсто, на 30.199 поени, додека С & П 500 скокна за 1,29 отсто, на 3.694 поени, а индексот Насдак порасна за 1,25 отсто, на рекордни 12.595 поени.
Додека инвеститорите беа загрижени за брзиот раст на бројот на нови ковид-19 инфекции, смртни случаи и хоспитализации во САД претходниот ден, тие вчера заклучија дека поради тоа, како и забавувањето на економското закрепнување, овие нови стимулативни мерки може да следат деновиве.