На терминскиот пазар во Соединетите Американски Држави, златото денес се тргува по 1,1 отсто повисока цена, достигнувајќи 3.151,10 долари за унца. Од почетокот на годината, цената на златото порасна за околу 18 проценти, додека во текот на 2024 година скокот изнесуваше приближно 27 проценти. Овој раст, меѓу другото, е поттикнат од зголемената побарувачка на централните банки, но и од најавите за нови американски царини.
Американскиот претседател Доналд Трамп се подготвува во среда да воведе реципрочни царини за сите земји што ја царинат американската стока, додека во четврток треба да стапат на сила царините за увоз на автомобили. Очекувањата за овие мерки предизвикаа дополнителна несигурност на финансиските пазари.
„Бран побарувачка за злато ја одразува загриженоста на инвеститорите поради царините. Се стравува дека ова ќе го ограничи економскиот раст“, изјави Нитеш Шаг од WisdomTree, пренесува Индекс.хр. Тој додава дека овие стравувања го поддржуваат растот на цените на благородните метали.
Златото традиционално се смета за сигурно засолниште во периоди на економска и политичка нестабилност, а инвеститорите често го користат за заштита на вредноста на имотот, особено во услови на ниски каматни стапки. Централните банки, исто така, ги зголемуваат своите резерви на злато за да обезбедат стабилност во времиња на геополитички и економски тензии.
Цената на среброто, пак, забележа пад од 0,4 отсто, намалувајќи се на 33,96 долари за унца. Платината и паладиумот бележат раст од 0,8 отсто, при што цената на платината достигна 991,55 долари, додека паладиумот достигна 979 долари за унца.