Дури 38 отсто од граѓаните на Европската унија (ЕУ) се загрижени дека нема да можат да си ги платат сметките, додека 35 отсто стравуваат дека нема да можат да си ја дозволат омилената храна, покажува истражувањето по повод Светскиот ден на правата на потрошувачите. Во извештајот објавен од Европската комисија (ЕК) се наведува и дека 74 отсто од испитаниците се изјасниле дека е намалено пакувањето на производите, а 52 отсто сметаат дека стоката е со послаб квалитет, без промена на цената. Кога станува збор за купување преку Интернет, граѓаните на ЕУ имаат 60 отсто поголеми шанси да доживеат проблеми отколку ако купуваат исти производи во продавниците, покажува истражувањето, пренесува Банкар.ме.
На пример, 26 отсто од луѓето рекле дека наишле на проблеми кога купувале преку Интернет и сметале дека имаат легитимни причини да се жалат, во споредба со 16 отсто од купувачите во продавниците. Во исто време, во истражувањето се наведува дека трендот на купување преку Интернет продолжил и дека сега 76 отсто од сите купувања се вршат преку Интернет. Дополнително, 93 отсто од онлајн купувачите изразија загриженост за персонализираното рекламирање, 71 отсто се плашеа од собирање на нивните податоци без согласност, објави Кликс.ба. Речиси 45 отсто од потрошувачите пријавиле дека биле измамени преку Интернет, додека многу потрошувачи доживуваат нефер практики, вклучувајќи лажни критики 66 отсто и погрешни попусти 61 отсто. При купувањето на неисправен производ, 40 отсто од испитаниците го замениле за нов, додека 35 отсто од потрошувачите се одлучиле за поправка, а девет отсто за купување друг од продавниците за користени производи.