Американската рејтинг агенција „Мудис“ денеска ги влоши изгледите за долгорочниот кредитен рејтинг на Кина од стабилен на негативен. Меѓу причините тие ја наведуваат веројатната државна финансиска поддршка за локалните власти и државните компании, што претставува ризик, пренесува француската новинска агенција АФП.
„Намалувањето на рејтингот ги одразува растечките докази дека владата и поширокиот јавен сектор ќе обезбедат финансиска поддршка за регионалните и локалните власти… и државните претпријатија, што претставува голем ризик од пад на фискалната, економската и институционалната сила на Кина“, соопшти рејтинг агенцијата.
Ризиците се поврзани со структурно и постојано понизок среднорочен економски раст и намалување на секторот недвижности, додаде таа.
Кинескиот сектор на недвижности, кој сочинува околу една четвртина од кинескиот бруто домашен производ (БДП), е во длабока должничка криза. Некои од најголемите развивачи на недвижнини се оптоварени со долгови од милијарди американски долари и им се заканува колапс.
Кинеското Министерство за финансии одговори, велејќи дека е разочарано од одлуката на Мудис.
„Макроекономската ситуација во Кина се зајакнува од почетокот на годината – во услови на сложена и тешка меѓународна ситуација и нестабилно економско закрепнување“, рече портпаролот на Министерството, пренесе АФП.
Економското закрепнување на Кина е попречено од слабото потрошувачко и економско расположение, долготрајната станбена криза, рекордната невработеност кај младите и глобалното економско забавување што доведе до пад на побарувачката за кинески производи, наведува АФП.
Кинескиот БДП порасна за 4,9 отсто на годишно ниво во третиот квартал, надминувајќи ги очекувањата на аналитичарите за раст од околу 4,4 отсто, но е помал од растот од 6,3 отсто во вториот квартал.