Компаниите Фолксваген и БМВ пријавија силен пораст на продажбата во Соединетите Американски Држави, само неколку часа пред американскиот претседател Доналд Трамп да објави, според планираното, големи царини за стоки од Европската унија.
Фолксваген соопшти дека продажбата на автомобили во САД во првиот квартал се зголемила за 7,1 отсто на 87.915 возила, благодарение на силните резултати од Taos, Jetta и ID.4.
BMW во првите три месеци забележа раст и на американскиот пазар, пренесува ДПА. Компанијата продаде 87.615 автомобили од својата главна марка, што е зголемување од 3,7 отсто во споредба со минатата година.
Посебно добро поминаа е-возилата, чија продажба скокна за повеќе од 25 проценти.
Ауди, подружница на Фолксваген, забележа пад од три проценти во однос на првиот квартал од 2024 година, иако резултатите за март беа подобри, со раст од осум проценти.
Резултатите сугерираат дека долготрајните закани за високи царини за увозот од ЕУ можеби доведоа до скок во продажбата. Соединетите држави во моментов наметнуваат тарифи од 2,5 отсто за патничките автомобили од ЕУ, додека царините за камионите и тешките возила се 25 отсто.
Иако Кина е единствениот најважен пазар за германските производители на автомобили, тие главно произведуваат возила за кинескиот пазар директно во таа земја.
Трговските врски со САД од ЕУ се многу пообемни, па падот на продажбата во Америка може сериозно да ги потресе европските фабрики.