Соединетите држави беа главниот извозен пазар на автомобили од Европската унија во 2024 година, со вредност на испораките речиси пет пати поголема од вредноста на увозот, покажаа во вторникот податоците на Европската статистичка служба.
Минатата година ЕУ извезла автомобили во вредност од 165,2 милијарди евра, додека увозот достигнал 75,9 милијарди евра.
Во однос на 2019 година, вредноста на извозот е зголемена за 17,7 отсто, а на увозот за 20 отсто, утврдија статистичарите.
Бројот на испорачани автомобили е намален од 2019 до 2024 година за 13,2 отсто, а увезени автомобили за само три отсто.
Јазот во промената на вредноста и обемот на трговската размена го одразува растот на цените во петгодишниот период кој завршува во 2024 година, заклучува Евростат.
Најголем извозен пазар на автомобили од ЕУ лани беше САД, со вредност од 38,9 милијарди евра. Вредноста на увозот на американски автомобили во ЕУ беше речиси пет пати помала и изнесуваше само 8,4 милијарди евра.
Во рангирањето на извозните пазари на автомобилски компании од ЕУ, второто место го зазеде Обединетото Кралство, со вредност на испораките од 34,4 милијарди евра. Следува Кина со 14,5 и Турција со 12 милијарди евра.
Главни добавувачи на автомобили за клиентите во ЕУ минатата година беа Кина и Јапонија, според вредноста на увозот од 12,7 милијарди и 12,3 милијарди евра, соодветно.
На трето место е Обединетото Кралство, која на ЕУ испорача автомобили вредни 11 милијарди евра. Следува Турција со вредност на увезени возила од 9,1 милијарди евра.
Да потсетиме, американскиот претседател Доналд Трамп најави воведување увозна царина од 25 проценти на сите возила и сите делови за автомобилската индустрија.