Сојуз на синдикати на Македонија до сите координатори на пратенички групи во Собранието достави предлог-амандман, кој значи да се зголеми основната нето-плата на вработените во органите на државната и на локалната власт и други државни органи, основани согласно со Уставот и со закон и – институциите кои вршат дејности од областа на образованието, науката, здравството, културата, трудот, социјалната заштита и заштитата на детето, спортот, армијата, полицијата како и во други дејности од јавен интерес утврден со закон, а организирани како агенции, фондови, јавни установи и јавни претпријатија, основани од Република Македонија или од општините, од градот Скопје, како и од општините во градот Скопје за 2.806 денари во нето-износ согласно со зголемувањето на минималната плата.

„Минатата недела во координација со пратениците од ВМРО-ДПМНЕ амандманот и официјално од нивна страна беше доставен до Собранието согласно процедурите, а јавна поддршка добивме и од политичката партија Левица, како и од Демократски сојуз, Социјалистичка партија и ДОМ, додека СДСМ калкулира, а ДУИ сè уште молчи.

Апелираме амандманот во Собрание да биде изгласан пред најавеното дополнително покачување на струјата, нафтените деривати, цените на основните производи и други, кои, пак, ќе предизвикаат дополнителни ценовни шокови насекаде и дополнителни ќе ја обезвреднат платата на работниците.

Затоа е непходно платите да се покачат веднаш со донесување на ребалансот за минимум 2.806 денари уште од 1. 7. 2022 година за да може да се амортизираат барем малку овие покачувања, особено ако се знае дека од почеток на годината вредноста на синдикалната минимална кошничка пораснала за 2.980 денари, за една година 4.635 денари, пари кои ги нема во буџетот на едно семејство и тоа само за преживување во тековниот месец.

Очекуваме сите пратеници да го поддржат амандманот на ССМ, кој е доставен од пратениците од ВМРО-ДПМНЕ, поради тоа што соработката претставниците на работниците и претставниците на народот е значајна алка за унапредување на работничките права и во иднина треба да биде пракса за надминување на сите предизвици.

ССМ смета дека ако се изгласа ребалансот на буџетот без да се предвидат средства за зголемување на платите во јавниот сектор, во тој случај нема да може да се постапи согласно со закон и ќе нема средства за усогласување на платите на вработени во јавниот сектор ниту од 1. 7. 2022 година, како што е барањето на ССМ и работниците, а ниту пак за услогласување во Законскиот рок  и на тој начин ССМ како единствен репрезентативен претставник на работниците во јавниот сектор е ставен пред свршен чин и е донесена Одлуката за повикување и поведување на штрајк, кој ќе се одржи на 22. 6. 2022 година, кога целиот јавен сектор ќе застане за работникот да опстане!“, се вели во соопштението од Сојузот на синдикатите на Македонија.