Оваа година Стопанска банка АД – Скопје одлучив „Денот на штедење“ да го прослави на „зелен“ начин, користејќи ги овие ретки сончеви денови за убава акција во која ги поканува сите граѓани да се вклучат заедно со своите семејства. Имено, како што е познато, Банката преку проектот „Вози право, вози здраво“ изгради на 2 локации во Скопје вело содржини кои ентузијастички се користат од децата и младите.
Поради covid-19 рестрикциите овие 2 години Стопанска банка АД – Скопје не беше во можност да ги спроведе своите популарни масовни настани и целиот фокус на општествено одговорните активности беше насочен кон здравствениот систем и предизвикот во борбата против ковид. Но, тоа што Банката сака сега да го направи е на скромен начин да потсети дека се грижи за животната средина и за нашето непосредно окружување, па затоа во петок и сабота ќе организира раззеленување и разубавување на двете вело локации.
Агендата за малите настани е во соработка со екипи на Паркови и зеленило:
• Петок 29. 10. 2021 во парк Македонија спроти Веро2, Тафталиџе на СТБ Детскиот велодром од 10 до 13 часот садење поголема количина на цвеќиња
• Сабота 30. 10. 2021 во Градски Парк околу ТОПСИ pumptrack од 10 до 13 часот садење на цвеќиња и дополнително зеленило (грмушки и дрвца)
Пораката зад овие активности е дека секоја инвестиција има свој плод за подобра иднина, а и дополнителната симболика во тоа да гледаш како твојата инвестиција расте и дава плод/цвет.
Без оглед дали е тоа инвестиција во пари, имот или во поздрава животна средина, потребно е да се размислува на иднината и да се создаваат здрави навики. Ако секое дете што ќе насади цвеќе, дрвце или грмушка почуствува дека направило нешто корисно за сопствената и за иднината на своите најблиски, Стопанска банка АД – Скопје ќе знае дека ја постигнала целта.
Стопанска банка АД – Скопје Ве очекува заедно да го одбележите „Денот на штедење“ и да го разубавите нашето окружување.