Претседателот на Сојузот на синдикатите на Македонија (ССМ), Слободан Трендафилов вечерва во емисијата „Бизнис21“ на ТВ „21“ истакна дека пратениците веќе се согласуваат дека минимална плата од 500 евра е мала и тешко е да се преживее.

Како што додава, тоа го направиле по предлогот кој го дал за именуваните функционери една година да живеат со минимална плата.

„Пратениците почнаа да кукаат дека тешко било и со 500 евра да се живее во Македонија, а што да кажат овие со 395 евра?“, вели Трендафилов.

Во друго гостување, во емисијата „Топ тема“ на „Телма“, Трендафилов рече дека не можат да дозволат ниту еден работник да трпи политички притисоци какви што се обидуваат да му нанесат на синдикалното раководство“, рече тој.

„Токму затоа сме ние избрани од нив, токму затоа ние примаме плата од нив, за ние да ги трпиме сите притисоци. Јавна седница е сега. Не исклучуваме можност утре да е протест, а другиот ден да биде генерален штрајк. Тоа што денеска им го покажавме е дека не се плашиме, без оглед на тоа колку нè напаѓаат“, рече Трендафилов во однос на денешната јавна седница што се одржа пред македонското собрание.

Запрашан од што зависи дали тоа ќе биде протест или генерален штрајк, Трендафилов рече „денот кога ќе одлучиме како ќе ги нападнеме, ќе биде денот кога истите овие 300 луѓе ќе одлучат да го повикаат народот на улица доколку не нè почитуваат онака како што заслужуваме“.

„Напаѓаат со сите средства, со тешка артилерија и се надеваат дека ние ќе се криеме и нема да се браниме. За наша среќа, не сме почнале ниту да се браниме, а камоли да напаѓаме. Сметаме дека во една демократска држава, во едно демократско општество, една демократски избрана влада, треба да ги почитува претставниците на работниците, без оглед дали сме убави или не сме. Треба да ги почитуваат претставниците на работниците и покрај тоа што не им се допаѓа тоа што го зборуваат, а тоа е потреба од зголемување на платите. Денеска политичари нè напаѓаат, затоа што бараме плата. Се надевам дека нема да биде обратно, ние да ги напаѓаме политичарите. Тоа што е опасно и што е преседан, е што Владата се иззема во комплетниот случај од потребата за раст на платите и покрај тоа што таа е најголемиот работодавач во државатa“, рече Трендафилов.