Британија до крајот на мај овозможи плаќање на гас наменет за Европската унија при трансакции со руската Гаспромбанк и нејзините подружници, се наведува во документот на Министерството за финансии.

Дозволата им овозможува на физичките и правните лица да продолжат со плаќањата според договори кои започнаа до 21 април и активности како што се отворање и затворање банкарски сметки за целите на таквите плаќања, се вели во документ објавен на интернет. Во документот не е прецизирано која компанија побарала дозвола да работи со руска банка, санкционирана во Британија, но не и во ЕУ.

Рускиот претседател Владимир Путин на крајот на март нареди дека „непријателските“ земји од почетокот на април мора да платат за рускиот гас преку Гаспромбанк, која уплатените девизи ги продава и ги дозначува приходите на снабдувачот со гас во рубљи.

„Непријателски“ земји ги вклучуваат членките на ЕУ, Велика Британија, САД, Швајцарија и други земји кои воведоа санкции кон Русија поради нејзината инвазија на Украина, блокирајќи го пристапот на руските банки до меѓународниот платен систем.

Европската комисија оцени во интерна, техничка белешка, објавена во средината на април, дека купувачите од ЕУ ќе ја изгубат контролата врз своите пари со прифаќање на механизмот и на крајот ќе ги прекршат санкциите.

Процесот би бил целосно контролиран од Русија, а европските компании би ја изгубиле контролата врз парите во моментот на плаќањето, што значи непредвидливи дополнителни трошоци, се вели во белешката на Комисијата објавена од Ројтерс.

Портпаролот на Кремљ, Дмитриј Песков, во посебна изјава во петокот рече дека одлуката на Велика Британија да и дозволи на Гаспромбанк да врши плаќања до крајот на мај не ги променила плановите на Русија за плаќање гас во рубљи.

Сите рокови за плаќање се наведени во претседателскиот указ од крајот на март, а купувачите мора да ги подмират обврските согласно тој указ, нагласи Песков.

Претходно во текот на неделата, портпаролот на Кремљ рече дека „непријателските“ земји сè уште имаат време да се префрлат на плаќање со рубља-и, кои доспеваат во мај.