Во Европската унија, бројот на компании кои прогласија банкрот во вториот квартал од 2024 година е зголемен за 3,1 отсто во однос на првиот квартал, додека бројот на нови регистрации на компании во истиот период е намален за 2,1 отсто.
Ако се анализира состојбата по сектори, најголем квартален пораст на бројот на банкроти е забележан во градежништвото 3,8 отсто, финансиските дејности 2,6 отсто, трговијата 2,4 отсто и индустријата 1,6 отсто, објави Евростат.
Спротивно на тоа, бројот на банкроти во Европската унија квартално се намалува во секторот за информации и комуникации за 4,8 отсто, транспорт за 1,6 отсто, угостителство за 1,1 отсто и образование и социјални дејности за еден отсто. Надолен тренд на регистрации на нови фирми во ЕУ е забележан во сите сектори, пренесува Танјуг.
Најголем квартален пад на регистрациите на нови фирми има во трговијата и изнесува 4,7 отсто, потоа индустријата со 3,6 отсто и образованието и социјалните дејности со 3,4 отсто. Како што се наведува во извештајот, најмал квартален пад на регистрациите од 0,7 отсто е забележан кај финансиските активности.