Цените на акциите пораснаа на Волстрит во средата, но откако американскиот претседател Доналд Трамп објави реципрочни царини повисоки од очекуваните, фјучерсите индекси нагло паднаа.

Индексот Dow Jones во средата зајакна 0,56 отсто, на 42.225 поени, додека S&P 500 порасна за 0,67 отсто, на 5.670 поени, а индексот Nasdaq за 0,87 отсто, на 17.601 поен.

Откако тргувањето беше нестабилно цел ден, кон крајот на тргувањето индексите вчера завршија во позитива благодарение на надежта на инвеститорите дека Трамп ќе биде попустлив по прашањето за новите царини.

Но, по затворањето на Волстрит, фјучерсите на S&P 500 потонаа за повеќе од 3 отсто, а Nasdaq повеќе од 4 отсто, бидејќи Трамп објави реципрочни царини повисоки од очекуваните.

Ескалација на царинската војна

Така, од 5 април ќе се наплаќа царина од 10 отсто на целиот увоз, а дополнителни царини ќе се применуваат за увозот од земјите со кои САД имаат најголем трговски дефицит.

Увозот од Кина, кој веќе подлежи на царини од 20 отсто, во иднина ќе подлежи на дополнителни давачки од 34 отсто, 24 отсто за увоз од Јапонија, 26 отсто од Индија, 25 отсто од Јужна Кореја и 20 отсто од Европската унија.

„Таквите царини би можеле да ги наречеме „полоши од најлошото сценарио“ од кое стравуваше Волстрит“, напишаа аналитичарите на Ведбуш во прегледот на ситуацијата на пазарот.

Поради тоа, цените на акциите на азиските берзи остро паднаа во четвртокот наутро. Јапонскиот индекс Никеи беше во минус од 2,7 отсто околу 4:30 часот, додека цените на акциите во Австралија, Јужна Кореја и Хонг Конг паднаа меѓу 1,1 и 1,6 отсто.

Ризикот од рецесија расте

Бидејќи многу земји, вклучувајќи ги Кина, Канада и ЕУ, најавија контрамерки, инвеститорите стравуваат од ескалација на тарифната војна, што може да предизвика зголемување на инфлацијата и забавување на растот во најголемите економии, па дури и рецесија.

„Најавените царини далеку ги надминуваат основните очекувања и доколку преговорите за нивно намалување не се започнат веднаш, очекувањата за рецесија во американската економија драстично ќе се зголемат“, вели Тони Сајкамор, аналитичар во IG Market.

Поради неизвесноста на финансиските пазари утринава пораснаа курсевите на јапонскиот јен и на швајцарскиот франк, валути кои во неизвесни времиња важат за побезбедно засолниште за капиталот, додека вредноста на американскиот долар во однос на кошницата главни валути значително падна.