Извршниот директор на „Berkshire Hathaway“, Ворен Бафет денес изјави дека ова може да биде вистинско време да се купат акции по пониска цена.
Бафет во интервју за „CNBC” истакна дека долгорочните перспективи за бизнисот не се променети и им предложил на инвеститорите кога купуваат акции да размислуваат долгорочно.
Покрај тоа, Бафет посочил дека инвеститорите не би требало да ги следат дневните вести кога донесуваат одлука во врска со тргувувањето на берзи.
Иако денес акциите на светските берзи нагло паднаа, на пример, „Dow Jones” изгуби повеќе од 800 поени на отворањето, Бафет изјави: „Тоа е добро за нас. Ние сме нето купувач на акции, догорочно гледано“.
„Повеќето луѓе чуваат акции, а би требало да сакаат пазарот да ослабне. Би требало да сакаат да купат по пониска цена“, додаде тој.
Да ве потсетиме, пазарите ширум светот минатата недела завршија во состојба на растечка паника. Не е тешко да се најде причината: коронавирусот продолжува да се шири, а има индиции дека некои од најголемите светски економии би можеле да паднат во рецесија, кога ефектите од појавата на вирусот се мешаат со некои нивни слабости од порано.
Цената на златото продолжи да расте денес, достигнувајќи нова историска највисока вредност во евра, фунти, швајцарски франци и јени.
Распространетоста на коронавирусот надвор од Кина предизвика неизвесност кај инвеститорите на глобалните пазари, во исто време туркајќи ја најниската вредност на акциите и цената на нафтата.